News Today
वणी, ता. १९ सप्टेंबर :
वणी तालुक्यात गेल्या काही महिन्यांपासून कोर्ट फी स्टॅम्प आणि नॉन-ज्युडिशियल स्टॅम्प यांच्या सततच्या टंचाईमुळे न्यायालयीन कामकाजावर मोठा परिणाम होत आहे. या गंभीर समस्येकडे लक्ष वेधण्यासाठी वणी बार असोसिएशनने उपविभागीय अधिकारी यांना निवेदन सादर करून तातडीने उपाययोजना करण्याची मागणी बार असोसिएशनचे अध्यक्ष ऍड. विरेंद्र महाजन व सचिव ऍड . अमोल टोंगे यांचे उपस्थितीत सर्व वकिलांनी केली आहे.
वकिलांना होत असलेला त्रास
वणी येथील वकिलांना कोर्ट फी स्टॅम्प न मिळाल्याने खटले नियोजित वेळेत दाखल करता येत नाहीत. अनेकदा त्यांना वरोरा, पांढरकवडा, केळापूर किंवा चंद्रपूर येथे जाऊन स्टॅम्प खरेदी करावे लागतात. या प्रक्रियेत वेळ, मेहनत आणि अतिरिक्त खर्च होऊन वकिलांसह याचिकाकर्त्यांचे मोठे नुकसान होते.
सर्वसामान्यांनाही फटका
ही अडचण फक्त वकिलांची नसून सामान्य नागरिकांनाही भेडसावत आहे. अल्पमूल्याचे नॉन-ज्युडिशियल स्टॅम्प उपलब्ध नसल्यामुळे लोकांना महागडे स्टॅम्प विकत घ्यावे लागतात. विशेषतः नोकरीसाठी अर्ज करणाऱ्या युवकांना शपथपत्र दाखल करताना स्टॅम्प मिळत नसल्याने नोकरीची संधी गमावण्याचा धोका निर्माण होतो.
कोषागारातूनच कमी पुरवठा
वणी महसूल कार्यालयातील विक्रेत्यांच्या मते, स्थानिक स्तरावर स्टॅम्पचा पुरवठा कमी असल्यामुळे ही समस्या उद्भवत आहे. कोषागार कार्यालयातून योग्य प्रमाणात स्टॅम्प उपलब्ध न झाल्याने संपूर्ण वणी तालुक्यात टंचाई निर्माण झाली आहे.
काळाबाजाराला खतपाणी
वकिलांच्या मते, ही समस्या तातडीने सोडवली नाही तर स्टॅम्पचा काळाबाजार होण्याची शक्यता नाकारता येत नाही. यामुळे सरकारलाही महसुली नुकसान सहन करावे लागेल. म्हणूनच या टंचाईमागचे खरे कारण शोधण्यासाठी स्वतंत्र चौकशी करावी, अशीही मागणी करण्यात आली आहे.
बार असोसिएशनची मागणी
निवेदनाद्वारे वणी बार असोसिएशनने कोर्ट फी स्टॅम्प तसेच नॉन-ज्युडिशियल स्टॅम्पचा तातडीने पुरवठा वाढवावा, विशेषतः ₹5, ₹10, ₹20 आणि त्यापेक्षा जास्त किमतीचे स्टॅम्प स्थानिक स्तरावर सहज उपलब्ध करून द्यावेत, अशी अपेक्षा व्यक्त केली.
