News Today
वणी : नेरड (पू.) येथील आज तारीख १९ रोजी गणेश विसर्जन सोहळा यंदा मोठ्या उत्साहात पार पडला. विसर्जन मिरवणुकीत वणी, झरी, मारेगाव, कोरपना तसेच चंद्रपूर तालुक्यातील महिला भजन मंडळांसह विविध गणेश मंडळांनी सहभाग घेतला होता.
या प्रसंगी नेरड (पू.) येथील नवयुवक गणेश उत्सव मंडळातर्फे उपस्थित सर्व मंडळांचा मान्यवरांच्या हस्ते सत्कार करण्यात आला. मंडळाचे अध्यक्ष प्रमोद तुरणकर यांच्या अध्यक्षतेखाली कार्यक्रम पार पडला. सामाजिक, सांस्कृतिक व धार्मिक कार्यात योगदान देणाऱ्या मंडळांचे कौतुक करून त्यांना श्रीफळ प्रदान करण्यात आले.
कार्यक्रमाचे सूत्रसंचालन दिलीप भोयर यांनी कुशलतेने केले, तर आभारप्रदर्शन संजय लेडांगे यांनी मानले. विसर्जनानंतर सर्व भक्तांना महाप्रसादाचे वाटप करण्यात आले. विशेष म्हणजे, या महाप्रसादासाठीची भोजन व्यवस्था गावकऱ्यांनी उत्साहाने सांभाळली. शिस्तबद्ध नियोजन, मनापासून केलेली सेवा आणि सामूहिक सहभाग यामुळे भोजनव्यवस्थेचे सर्वत्र कौतुक झाले.
गणेशोत्सवाच्या निमित्ताने परिसरात भक्तीभाव, सांस्कृतिक उत्साह, सामूहिक एकोपा आणि सेवाभाव यांचा सुंदर मेळ पाहायला मिळाला.
