News Today
वणी (ता. वणी):
येथील विद्यानगरी परिसरात राहणारे ज्येष्ठ पत्रकार रवी ढुमने वय ५० वर्ष यांनी सोमवार, दिनांक १५ डिसेंबर २०२५ रोजी सकाळी सुमारे १०.३० वाजताच्या सुमारास आपल्या राहत्या घरी गळफास लावून आत्महत्या केल्याची दुर्दैवी घटना घडली. या घटनेमुळे वणी शहरासह पत्रकार बांधवांमध्ये मोठी खळबळ उडाली असून सर्वत्र हळहळ व्यक्त केली जात आहे.
प्राप्त माहितीनुसार, रवी ढुमने हे विद्यानगरी, वणी येथे कुटुंबासह वास्तव्यास होते. त्यांच्या पश्चात पत्नी व दोन मुले असा परिवार आहे. सकाळच्या सुमारास ही घटना उघडकीस आल्यानंतर नातेवाईक व परिसरातील नागरिकांनी तात्काळ घटनास्थळी धाव घेतली.
घटनेची माहिती मिळताच वणी पोलिसांनी घटनास्थळी दाखल होऊन पंचनामा करीत असून . मृतदेह शवविच्छेदनासाठी पाठविण्याच्या तयारीला लागले आहे. आत्महत्येमागील नेमके कारण अद्याप स्पष्ट झालेले नाही. या प्रकरणी पुढील तपास पोलीस करत आहेत.
रवी ढुमने हे वणी तालुक्यातील एक परिचित पत्रकार म्हणून ओळखले जात होते. सामाजिक प्रश्न, स्थानिक घडामोडी आणि सामान्य जनतेच्या समस्या मांडण्यात त्यांचा सक्रीय सहभाग होता. त्यांच्या आकस्मिक निधनाने पत्रकारिता क्षेत्रात मोठी पोकळी निर्माण झाल्याची भावना व्यक्त होत आहे.
या घटनेनंतर विविध सामाजिक, राजकीय व पत्रकार संघटनांकडून शोक व्यक्त करण्यात येत असून, ढुमने कुटुंबीयांप्रती संवेदना व्यक्त केल्या जात आहेत.
