News Today
झरी-जामनी नगर पंचायतीच्या राजकारणात आज मोठी उलथापालथ पाहायला मिळाली. उबाठा गटाच्या नगराध्यक्षा सौ. संगीताताई बिजगुनवार यांच्याविरोधात अविश्वास ठराव मंजूर झाल्यानंतर शिंदेसेनेच्या सौ. शिलाताई चौधरी यांची नगराध्यक्षपदी निवड करण्यात आली. या निर्णायक घडामोडीमुळे संपूर्ण झरी तालुक्यातील राजकीय वातावरण ढवळून निघाले आहे.
नगर पंचायतीच्या विशेष सभेत अविश्वास ठरावावर मतदान घेण्यात आले. एकूण १५ नगरसेवकांपैकी १३ नगरसेवकांनी शिलाताई चौधरी यांच्या बाजूने मतदान केले. निवडणूक निर्णय अधिकाऱ्यांनी चौधरी यांना अधिकृतरित्या नगराध्यक्षा घोषित केले. यावेळी नगर पंचायतीचे मुख्याधिकारी उपस्थित होते.
या संपूर्ण राजकीय घडामोडींच्या केंद्रस्थानी भाजपमधून नाराज होऊन शिंदेसेनेत प्रवेश केलेले विजयबाबू चोरडिया असल्याची चर्चा राजकीय वर्तुळात रंगली आहे. विजयबाबू चोरडिया यांनी अत्यंत कुशल राजकीय खेळी करत नगरसेवकांची मोट बांधली आणि नगर पंचायतीतील सत्तासमीकरण पूर्णपणे बदलून टाकले. त्यांच्या या रणनीतीमुळे झरी तालुक्याच्या राजकारणाला नवे वळण मिळाले आहे.
नव्या नगराध्यक्षा शिलाताई चौधरी यांच्या निवडीनंतर शिंदेसेना गटात जल्लोषाचे वातावरण होते. यावेळी विजयबाबू चोरडिया यांच्या नेतृत्वाखाली शिवसेना नेते मनीष सुरवार, विनोद मोहितकर, चंद्रकांत घुगुल, नगरसेवक दिनेश जैस्वाल यांच्यासह अनेक पदाधिकारी व कार्यकर्ते मोठ्या संख्येने उपस्थित होते.
नगराध्यक्षा पदाची सूत्रे हाती घेतल्यानंतर बोलताना शिलाताई चौधरी यांनी, “झरी-जामनी नगर पंचायतीच्या विकासासाठी सर्व नगरसेवकांना विश्वासात घेऊन काम करणार असून जनतेच्या अपेक्षांना न्याय देण्याचा प्रयत्न करू,” असा विश्वास व्यक्त केला.
शीलाताई चौधरी यांनी या निवडीचे श्रेय शिवसेनाप्रमुख तथा उप मुख्यमंत्री एकनाथ शिंदे, जिल्ह्याचे पालकमंत्री संजय राठोड , माजी आमदार विश्वास नांदेकर, आणि विजयबाबू चोरडिया यांना देण्यात आले
या सत्ताबदलामुळे येणाऱ्या काळात झरी-जामनी नगर पंचायतीतील विकासकामे, राजकीय समीकरणे आणि तालुक्यातील राजकारण अधिकच तापण्याची चिन्हे दिसत आहेत.
१० वर्षात बोदकुरवारांना जे जमल नाही ते विजयबाबू चोरडिया यांनी १० आठवड्यात घडवून आणलं
मागील १० वर्ष भारतीय जनता पार्टीचे वणी विधानसभेवर आमदार म्हणून बोदकुरवार यांचे वर्चस्व होते. तसेच ते झरी तालुक्यातील धानोरा येथील रहिवासी असून देखील झरी पंचायत समितीवर भाजपचा झेंडा फडकविणे त्यांना शक्य झाले नाही परंतु भाजपला राम राम ठोकून शिंदेसेनेत प्रवेश घेऊन अवघ्या दहा आठवड्याचा कालावधीत विजयबाबू चोरडिया यांनी झरी नगर पंचायतीवर शिंदे सेनेचा झेंडा फडकवून दाखविल्याने जे १० वर्षात भाजपला जमलं नाही ते विजयबाबूंनी दहा आठवड्यात करून दाखवलं अशी चर्चा संपूर्ण वणी विधानसभा क्षेत्रासह जिल्ह्यात सुरू झाली आहे.
