News Today (दिलीप भोयर)
वणी (प्रतिनिधी) : वणी नगर परिषदेच्या अध्यक्षपदाच्या आरक्षणाने यंदा इतिहास रचला आहे. प्रथमच अनुसूचित जमातीच्या महिलेसाठी हे पद राखीव ठेवल्याची घोषणा होताच, संपूर्ण वणी शहरात आनंदाचे व उत्साहाचे वातावरण निर्माण झाले आहे. आदिवासी समाजातील माताभगिनींनी आनंदाच्या भावनांनी एकमेकांना मिठीत घेतले, जल्लोष साजरा केला, आणि आपल्या प्रतिनिधी होण्याची आशा व्यक्त केली आहे. डॉ. संचिता गेडाम (नगराळे) या महिलांमधून प्रचंड लोकप्रिय ठरत आहे.
या आरक्षणामुळे शहराच्या सामाजिक व राजकीय क्षेत्रात नव्या उमेदवारांची चर्चा सुरु झाली आहे. वणीतील नामांकित आणि उच्चशिक्षित स्त्रीरोग चिकित्सक डॉ. संचिता गेडाम (नगराळे) या सर्वांच्या पहिल्या पसंतीच्या उमेदवार ठरत आहेत. डॉ. गेडाम यांनी अनेक वर्षे महिला आरोग्य, जनजागृती, व समाजकल्याणाच्या क्षेत्रात योगदान दिले आहे. त्यांचे व्यक्तिमत्व हे विविध सामाजिक आणि शैक्षणिक बहुउद्देशीय उपक्रमांमुळे लोकप्रिय झाले आहे.
शहरातील लोकांनी त्यांच्या निवडीसाठी सामाजिक माध्यमांवरून आणि प्रत्यक्ष भेटीदरम्यान मोठा पाठिंबा दर्शविला आहे. “आदिवासी समाजाच्या महिलेला आता शहराची राजकीय दिशा ठरविण्याची संधी मिळाली आहे. त्या संधीसाठी तितक्याच समर्थ, उच्चशिक्षित आणि समाजाभिमुख नेतृत्वाची गरज होती. डॉ. गेडाम यांनी अनुसूचित जमातीतील महिलांना प्रेरणा दिली आहे”— अशा भावना सर्वत्र व्यक्त झाल्या.
नगरपालिकेच्या निवडणुकींच्या पार्श्वभूमीवर डॉ. गेडाम यांच्या नावाभोवती चर्चांचा आणि उमेदवारीची शक्यता वाढली असली, तरी समाजातील प्रत्येक गटाकडून त्या राजकीय नेत्याच्या भूमिकेस पात्र ठरतील, अशी अपेक्षा व्यक्त होत आहे. आदिवासी महिला आरक्षणामुळे शहराच्या सामाजिक समतेला बळ मिळेल, आणि वणी शहराला सक्षम महिला नेतृत्व लाभेल, अशी शहरवासीयांची विश्वासयुक्त प्रतिक्रिया आहे.
