News Today
वणी (जि. यवतमाळ) — यवतमाळ जिल्ह्याला ओला दुष्काळ घोषित करून शेतकऱ्यांना तातडीची मदत मिळावी, या मागणीसाठी शिवसेनेतर्फे ६ ऑक्टोबर रोजी वणी येथे आंदोलन करण्यात आले होते. या आंदोलनादरम्यान आदिवासी विकास मंत्री डॉ. अशोक उईके यांच्या ताफ्याला शिवसैनिकांनी अडवले होते. त्यानंतर पोलिसांनी संबंधित शिवसेना कार्यकर्त्यांविरुद्ध गंभीर गुन्हे दाखल करत त्यांना अटक केली. मात्र, न्यायालयीन प्रक्रियेत झालेल्या विलंबामुळे या शिवसैनिकांना अजूनही कोठडीतच रात्र काढावी लागत आहे.
न्यायालयीन कार्यवाही थांबली, शिवसैनिकांना दिलासा नाही
आज (८ ऑक्टोबर) रोजी या प्रकरणातील जामीन सुनावणी निश्चित करण्यात आली होती. परंतु अहवाल सादर करणारे संबंधित पोलिस अधिकारी न्यायालयात गैरहजर राहिल्याने सुनावणी पुढे ढकलली जाण्याची शक्यता निर्माण झाली आहे. त्यामुळे शिवसैनिकांच्या जामीनावर निर्णय आजही झाला नाही. परिणामी, कोठडीत असलेल्यांना पुन्हा एक रात्र तुरुंगात खर्च करावी लागणार आहे. या घटनेमुळे शिवसैनिकांमध्ये तीव्र नाराजी पसरली असून, स्थानिक स्तरावर प्रशासनाविरोधात संतापाची लाट उसळली आहे.
“राजकीय दबावाखाली कारवाई” — शिवसेनेचा आरोप
या प्रकरणाबाबत शिवसेना नेत्यांनी तीव्र प्रतिक्रिया व्यक्त करत सरकारवर थेट निशाणा साधला आहे. “वणीतील आंदोलन हे लोकशाही मार्गाने आणि पूर्णपणे शांततेत झाले होते. मात्र, भाजपने राजकीय सूडबुद्धीने या घटनेचा वापर करून आमच्या कार्यकर्त्यांवर गंभीर गुन्हे दाखल केले. जामीन प्रक्रिया पुढे जाऊ नये म्हणून सत्ताधाऱ्यांकडून दबाव आणला जात आहे,” असा आरोप शिवसेनेच्या नेत्यांनी पत्रकारांशी बोलताना केला.
शेतकऱ्यांच्या मदतीसाठी आंदोलन
सलग पावसामुळे यवतमाळ जिल्ह्यातील शेतकऱ्यांच्या पिकांचे प्रचंड नुकसान झाले आहे. शेतकरी आर्थिक संकटात सापडल्याने जिल्ह्याला ओला दुष्काळ जाहीर करण्याची मागणी शिवसेनेकडून करण्यात आली होती. या मागणीसाठीच शिवसैनिकांनी वणी येथे मंत्री डॉ. उईके यांच्या ताफ्याला अडवून रास्ता रोको प्रकार केला. मात्र, या घटनेनंतर पोलिसांनी आंदोलनकर्त्यांवर कठोर कारवाई केली, ज्यामुळे परिस्थिती अधिक तणावपूर्ण बनली आहे.
पुढील दिशा: आंदोलन तीव्र होणार
न्यायालयाकडून पुढील सुनावणीची तारीख उद्या जाहीर होण्याची शक्यता आहे. परंतु, सुनावणी पुन्हा तहकूब झाल्यास शिवसेना कार्यकर्त्यांनी संघर्ष तीव्र करण्याचा इशारा दिला आहे. जिल्हाधिकारी कार्यालयासमोर ठिय्या आंदोलन सुरू करण्याबाबत चर्चा सुरू असून, स्थानिक पातळीवर मोठ्या प्रमाणावर मोर्चा काढण्याचीही शक्यता वर्तवली जात आहे.
संतापाची लाट
राज्यात सध्या शेतकऱ्यांच्या मागण्यांसाठी विविध आंदोलन, उपोषणे सुरू आहेत. मात्र वणीतील प्रकरणाला राजकीय रंग देत सूडबुद्धीने कारवाई केल्याचा आरोप सर्वत्र होत असून, त्यामुळे सत्ताधाऱ्यांविरोधात जनतेचा रोष वाढताना दिसत आहे. प्रशासनाच्या विलंबामुळे आणि राजकीय हस्तक्षेपाच्या आरोपांमुळे वणी परिसरात वातावरण पुन्हा पेटण्याची चिन्हे दिसत आहेत. पोलिस विभागाने तपास अधिकारी बदलवून न्यायालयात अहवाल सादर केल्यास त्यांच्या जमातीचा मार्ग मोकळा होऊ शकते का याकडे सर्वांचे लक्ष लागले आहे.
