News Today
वणी :- मुकुटबन पोलीस स्टेशन हद्दीतील चिलई शिवार परिसरात सध्या अवैध कोंबडा बाजार जोमात सुरू असल्याची माहिती समोर येत आहे. या कोंबडा बाजारात केवळ कोंबड्यांच्या झुंजीच नव्हे, तर सर्रास अवैध दारू विक्री आणि पैशांवर आधारित झेंडीमुंडीचा जुगार खेळला जात असल्याचे आरोप नागरिकांकडून करण्यात येत आहेत.
मिळालेल्या माहितीनुसार, या बाजारात कोंबड्यांच्या पायांना धारदार शस्त्र (ब्लेड/सुरी) बांधून त्यांना एकमेकांशी झुंजवले जाते. कोंबडे गंभीर जखमी होईपर्यंत किंवा मृत्युमुखी पडेपर्यंत ही अमानुष झुंज सुरू ठेवली जाते. या झुंजींवर हजारो ते लाखो रुपयांची शर्यत लावली जात असल्याने हा प्रकार सरळसरळ जुगाराच्या कक्षेत मोडतो.
या अवैध बाजारामुळे परिसरात मोठ्या प्रमाणावर पैशांची उलाढाल होत असून, काही समाजकंटक यामध्ये सक्रिय सहभाग घेत असल्याचे दिसून येते. पोलीस प्रशासनाच्या दुर्लक्षामुळे किंवा कथित आर्थिक ‘चिरीमिरी’मुळेच हा अवैध प्रकार राजरोसपणे सुरू असल्याचे आरोप स्थानिक नागरिक करत आहेत. यामध्ये विशेषतः सर्वसामान्य शेतकरी व शेतमजुरांची मुले आर्थिक आमिषाला बळी पडून या जुगारात ओढली जात असून, अनेकांचे संसार उध्वस्त होत आहेत.
या अवैध व्यवसायाचा दुष्परिणाम संपूर्ण परिसरावर होताना दिसत आहे. चोऱ्या, मारहाणीच्या घटना वाढल्या असून महिलांवरील अत्याचारांच्या घटनांमध्येही वाढ झाल्याची भीती व्यक्त केली जात आहे. दारू, जुगार आणि हिंसाचार यामुळे परिसरातील सामाजिक शांतता धोक्यात आली आहे.
स्थानिक नागरिकांनी प्रशासनाकडे वारंवार तक्रारी करूनही ठोस कारवाई होत नसल्याने नाराजी व्यक्त केली जात आहे. या अवैध कोंबडा बाजारावर तातडीने बंदी घालून दोषींवर कठोर कारवाई करावी, तसेच परिसरात कायदा व सुव्यवस्था अबाधित ठेवण्यासाठी नियमित पोलीस गस्त वाढवावी, अशी जोरदार मागणी नागरिकांकडून होत आहे.
जर वेळीच कठोर पावले उचलली गेली नाहीत, तर या अवैध धंद्यामुळे भविष्यात आणखी गंभीर सामाजिक समस्या निर्माण होण्याची शक्यता नाकारता येत नाही.
याबाबत पोलिस स्टेशन मुकुटबनशी संपर्क साधला असता तेथील पोलिस कर्मचारी दिपक ताटे यांनी असे सांगितले की त्या बीटचे जमादार दिलीप जाधव असून पोलिस निरीक्षक व कोंबडा बाजाराचा कोणताही संबंध नाही. बीट जमादार यांनी परस्पर सुरू केला असेल त्यामुळे आम्हाला कोणतीही माहिती नाही असे उडवा उडविचे व बेजबदारीचे उत्तर दिले.
मुकुटबन पोलिस स्टेशन हद्दीत अनेक बेकायदेशीर व्यवसायाला आला मिळत आहे चालना
मुकुटबन पोलीस स्टेशन हद्दीतील अनेक गावांमध्ये खुलेआम सर्रासरित्या अवैध्य देशी दारूची विक्री तसेच वरली मटका आणि अवैध वाळू वाहतूक चालवल्या जात आहे त्यातच हा वरून कोंबडा बाजार भरून परिसरातील कायदा सुव्यवस्था प्रचंड मोठ्या प्रमाणात बाधित केला जात आहे. या अवैध व्यवसायाला नेमकं पाठीशी कोण घालत आहे असा प्रश्न सर्वसामान्य नागरिकातून केला जात आहे.
