News Today
वणी :- येथील ज्येष्ठ पत्रकार रवी ढुमने यांच्या आत्महत्येप्रकरणी आज महत्त्वाची माहिती समोर आली असून, त्यांच्या वैयक्तिक डायरीत केलेल्या नोंदी व मोबाईलवरील व्हॉट्सॲप संदेशांमुळे या घटनेला नवे वळण मिळाले आहे. RSS चे कार्यकर्ते विक्की नानवानी यांनी फसवणूक केल्याचे आरोप केले आहे.
कुटुंबीयांना रवी ढुमने यांच्या घरातून त्यांची वैयक्तिक डायरी सापडली असून, त्यामध्ये शेतीवरील कर्ज व्यवहार आणि फसवणुकीबाबत तणाव असल्याचा उल्लेख आढळून आल्याची माहिती आहे. डायरीतील नोंदींमध्ये त्यांनी एका व्यक्तीचे नाव नमूद करत, आपण आर्थिक अडचणीत सापडलो असून मानसिक दबावाखाली असल्याचे संकेत दिल्याचे सांगितले जात आहे.
रवी ढुमणे यांच्या डायरीतील नोंदी सापडल्याने त्यांचा मुलगा नयन आनंदराव उर्फ रवी ढुमणे यांनी विक्रम उर्फ विक्की नानवाणी, सुमित रामचंद्र नानवाणी, राजू राजया बालगोणीवार, योगेश रामचंद्र नानवाणी, श्रीनिवास राजा या बालगोनीवार यांचे विरोधात पोलिसात तक्रार सादर केली आहे.
तसेच त्यांच्या मोबाईल फोनमध्ये विक्की उर्फ विक्रम नानवानी यांना पाठवलेले काही व्हॉट्सॲप संदेश पोलिसांच्या हाती लागले असून, त्या संदेशांमध्ये शेतीच्या कर्जाच्या व्यवहारासंदर्भात नाराजी, तक्रार आणि मानसिक त्रासाचा उल्लेख असल्याची प्राथमिक माहिती आहे. संबंधित संदेश व डायरीतील नोंदी पोलिसांकडून तपासाअंती पडताळून पाहिल्या जात आहेत.
सूत्रांकडून मिळालेल्या माहितीनुसार, रवी ढुमने यांनी आर्थिक व्यवहारामुळे आपण अडचणीत आल्याचे आणि त्याचा मानसिक परिणाम झाल्याचे या लिखाणातून व्यक्त केले असल्याचे समजते. मात्र, हे सर्व उल्लेख प्राथमिक स्वरूपाचे असून, त्यावरून कोणताही निष्कर्ष काढण्यात आलेला नाही.
या प्रकरणात वणी पोलीस डायरी, मोबाईल संदेश, कॉल रेकॉर्ड्स तसेच संबंधित आर्थिक व्यवहारांची चौकशी करीत असून, आत्महत्येस प्रवृत्त केल्याचा कोणताही प्रकार घडला आहे का, याचा तपास सुरू आहे.
दरम्यान, या घटनेमुळे वणी शहरात तसेच पत्रकारिता क्षेत्रात शोककळा पसरली असून, सत्य लवकरात लवकर समोर यावे, अशी मागणी विविध स्तरांतून होत आहे.
त्याबाबत विक्की नानवाणी वांनी विचारणा केली असता सदर शेतीच्या विक्री प्रकरणी परवानगी होणे बाकी होते म्हणून त्यांनी शेत मार्गेज करून पैसे दिले अशी माहिती दिली आहे.
