News Today
वणी :- तालुक्यातील निलजई गाव परिसरात कार्यरत असलेल्या GNR कंपनीत काम करणाऱ्या एका कामगाराचा संशयास्पद मृत्यू झाल्याने परिसरात एकच खळबळ उडाली आहे. ही कंपनी WCL भालर उपप्रबंधक कार्यालयाच्या अंतर्गत येत असून कोळसा खाणीत माती काढण्याचे काम करत आहे.
ही घटना ३० डिसेंबर २०२५ रोजी रात्री सुमारे १०.३० वाजताच्या सुमारास घडली. मात्र हा प्रकार अपघात आहे की घातपात, याबाबत अद्याप कोणतीही अधिकृत माहिती समोर आलेली नाही.
घटनेनंतर गंभीर अवस्थेत असलेल्या कामगाराला चंद्रपूर येथील शासकीय रुग्णालयात दाखल करण्यात आले. मात्र उपचारापूर्वीच चिकित्सकांनी त्याला मृत घोषित केले.
या प्रकरणी कंपनीकडून अत्यंत संशयास्पद मौन पाळले जात आहे. GNR कंपनीचे प्रतिनिधी मधू मन्नेम यांच्याशी संपर्क साधला असता त्यांनी घटनेबाबत कोणतीही माहिती देण्यास असमर्थता दर्शवली.
विशेष म्हणजे सदर मृत कामगार हा परप्रांतीय असल्याचे सांगण्यात येत असून, त्याचे नाव जाहीर करण्यासही कंपनीने नकार दिला आहे.
घटना घडताच कंपनीत काम करणाऱ्या इतर कामगारांमध्ये तणावाचे वातावरण निर्माण झाले होते. काही काळ परिस्थिती चिघळली असून, या भागात मोठ्या प्रमाणावर कामगार कार्यरत असताना त्यांच्या सुरक्षेचा प्रश्न पुन्हा ऐरणीवर आला आहे.
दरम्यान, या घटनेची माहिती संबंधित पोलिस स्टेशनला देण्यात आल्याचे सांगण्यात येत आहे. मात्र पोलिसांकडूनही अद्याप अधिकृत माहिती देण्यात आलेली नाही.
कामगारांच्या जीवाशी खेळ करणाऱ्या अशा घटनांमुळे खनन क्षेत्रातील सुरक्षा व्यवस्थेवर गंभीर प्रश्नचिन्ह उपस्थित झाले असून, या प्रकरणाची सखोल व निष्पक्ष चौकशी करण्याची मागणी जोर धरू लागली आहे.
