News Today
वणी तालुक्यातील नेरड (पुरड) येथील ग्रामपंचायतीमध्ये सन २०२२ ते २०२५ या कालावधीत मोठ्या प्रमाणात आर्थिक अफरातफर व प्रशासकीय अनियमितता झाल्याचा गंभीर प्रकार उघडकीस आला आहे. पंचायत समिती वणीच्या आदेशानुसार मा. विस्तार अधिकारी व सहाय्यक अभियंता यांनी केलेल्या चौकशीत तत्कालीन सरपंच व ग्रामसेवक/ग्रामविस्तार अधिकारी दोषी असल्याचे स्पष्ट झाले आहे.
ग्रामस्थांनी यापूर्वी दि. १५ सप्टेंबर, १४ ऑक्टोबर व १६ ऑक्टोबर २०२५ रोजी लेखी तक्रारी दाखल केल्यानंतर पंचायत समिती वणीने दि. १ ऑक्टोबर २०२५ रोजी चौकशीचे आदेश दिले होते. त्यानुसार सादर करण्यात आलेल्या अहवालात एकूण नऊ मुद्द्यांवर गंभीर अनियमितता झाल्याचे नमूद करण्यात आले आहे.
१५ वा वित्त आयोग निधीतून करण्यात आलेल्या कामांमध्ये तब्बल ४ लाख ९० हजार २६० रुपयांची अफरातफर झाल्याचे निष्पन्न झाले असून अनेक वाउचर व बिले उपलब्ध नाहीत. तसेच एल.ई.डी. स्ट्रीट लाईट खरेदीतही मोठी तफावत आढळून आली असून ४२ बल्बचे बिल असताना प्रत्यक्षात २९ बल्बच बसविण्यात आल्याचे समोर आले आहे. यामध्ये २६ हजार ४६१ रुपयांची आर्थिक हानी झाल्याचे चौकशी अहवालात नमूद आहे.
महाराष्ट्र ग्रामपंचायत अधिनियम १९५९ नुसार घेणे बंधनकारक असलेल्या मासिक सभा व ग्रामसभा न घेतल्याने ग्रामपंचायतीच्या कामकाजावर कोणतेही लोकनियंत्रण राहिले नसल्याचे चित्र आहे. तसेच जन सुविधा योजनेअंतर्गत सिमेंट काँक्रीट रस्ता बांधकामासाठी कोणताही वैध ठराव नसताना रेड झोन क्षेत्रात काम करून ४ लाख ६७ हजार ८९० रुपयांचा खर्च करण्यात आल्याचे उघड झाले आहे.
याशिवाय एकाच व्यक्तीस दोन शासकीय पदांचे मानधन देणे, कॅशबुकमध्ये अपूर्ण नोंदी ठेवणे तसेच दिव्यांग व्यक्तींसाठी मंजूर निधी खर्च न करणे असे गंभीर प्रकारही चौकशीत समोर आले आहेत.
या सर्व प्रकरणी दोषींवर कठोर कारवाई करून अफरातफरीची संपूर्ण रक्कम वसूल करावी तसेच संबंधितांविरुद्ध फौजदारी गुन्हे दाखल करावेत, अशी मागणी ग्रामस्थांनी गटविकास अधिकारी वणी यांच्याकडे केली आहे. आता प्रशासन या प्रकरणात कोणती ठोस कारवाई करते याकडे संपूर्ण तालुक्याचे लक्ष लागले आहे.
यावेळी राष्ट्रवादी काँग्रेस पार्टीचे विधानसभा अध्यक्ष दिलीप भोयर, माजी उपसरपंच विनायक तुरणकर, संजय लेडांगे, विठ्ठल ठावरी, मनोज ठावरी, गणपत आमने, बंडू झाडे, पांडुरंग ठावारी, गुलाब राखुंडे, रोशन तुरणकर, भाऊराव चीने, जगदीश जुनगरीयांचेसह असंख्य ग्रामवासी उपस्थित होते.
