News Today
वणी : वणी तालुक्यातील चिलई–मुंड्रा शिवार परिसरात के. के. माईन्स अँड मिनरल्स या खासगी कंपनीच्या नावाखाली शेकडो मौल्यवान सागवान वृक्षांची तसेच इतर वृक्षांची मोठ्या प्रमाणावर तोड सुरू असल्याची धक्कादायक माहिती ग्रामस्थांनी दिली आहे. या अनधिकृत तोडीमुळे ग्रामस्थांमध्ये संतापाची लाट उसळली असून, पर्यावरणीय संतुलन धोक्यात येण्याची भीती व्यक्त केली जात आहे.
ग्रामपंचायत कुंड्राचे सरपंच विजय मारोती ठाकरी यांनी या संदर्भात मा. उपविभागीय अधिकारी, वणी तसेच वनपरिक्षेत्राधिकारी, वणी यांना निवेदन देऊन तातडीने कारवाईची मागणी केली आहे.
सरपंच ठाकरी यांनी दिलेल्या निवेदनात म्हटले आहे की, कंपनीच्या नावाखाली वृक्षतोडीचे काम सुरू असून त्यासाठी प्रोकलेम मशीनचा वापर करण्यात आल्याने रस्त्यावर मोठमोठे खडे पडले आहेत. त्यामुळे शेतकरी व ग्रामस्थांना वाहतुकीत प्रचंड अडचणींचा सामना करावा लागत आहे.
ग्रामस्थांचा आरोप आहे की, वृक्षतोड करताना कोणतेही कायदेशीर नियम, प्रक्रिया वा परवानग्या पाळल्या जात नाहीत. मौल्यवान सागवान वृक्षांची अशी तोड थांबवून दोषींवर कठोर कारवाई करणे आवश्यक असल्याचे निवेदनात नमूद करण्यात आले आहे.
मागण्या अशा :
चिलई–मुंड्रा शिवारातील सुरु असलेल्या वृक्षतोडीची चौकशी करून दोषींवर कारवाई करावी.
अनधिकृत वृक्षतोड तातडीने थांबवावी.
संबंधित कंपनी अथवा व्यक्तींवर गुन्हे दाखल करावेत.
पर्यावरणाचे संरक्षण करण्यासाठी कडक उपाययोजना कराव्यात.
प्रोकलेम मशीनमुळे रस्त्यावर पडलेले खडे हटवून शेतकऱ्यांना वाहतुकीची सुविधा उपलब्ध करावी.
या संपूर्ण प्रकरणाची चौकशी करून कायदेशीर कारवाई करण्यात यावी, अशी ग्रामस्थांची ठाम मागणी आहे. दरम्यान, प्रशासन या गंभीर प्रकरणात कोणती पावले उचलते, याकडे सर्वांचे लक्ष लागले आहे.
