News Today
वणी :- तालुक्यातील मौजा बोरगाव (मे), येथे दिनांक ०४ ऑगस्ट २०२५ रोजी सोमवार दिनी महसूल विभाग, वणी यांच्या वतीने छत्रपती शिवाजी महाराज राजस्व समाधान शिबिर आयोजित करण्यात आले. या शिबिरास एन. व्ही. बांगडे, मंडळ अधिकारी, शिरपूर प्रमुख पाहुणे म्हणून उपस्थित होते.
या शिबिरात शेतकरी बांधवांना ७/१२, ८-अ उतारे, तसेच शालेय विद्यार्थ्यांना विविध प्रकारचे दाखले वितरित करण्यात आले.
कृषी विभाग, महाराष्ट्र शासन यांच्यातर्फे तालुका कृषी अधिकारी वणी, दिलीप राऊत यांच्या मार्गदर्शनाखाली शेतकऱ्यांना कृषी विभागाच्या विविध योजनांची माहिती देण्यात आली व माहितीपत्रके वाटप करण्यात आले.
एम. आर. पत्रे, सहायक कृषी अधिकारी यांनी शेतकऱ्यांना MREGS फळबाग लागवड योजना, भाऊसाहेब फुंडकर फळबाग लागवड योजना, बांबू लागवड योजना, तुती लागवड योजना, मुख्यमंत्री शाश्वत सिंचन योजना अंतर्गत शेततळे, यांत्रिकीकरण, PMFME योजना यांची सविस्तर माहिती दिली व शेतकऱ्यांनी या योजनांचा जास्तीत जास्त लाभ घ्यावा, तसेच गावातील १००% शेतकऱ्यांनी तात्काळ फार्मर आय.डी. तयार करून खरीप हंगामातील पिकांसाठी पिकविमा घेण्याचे आवाहन केले.
डी. आर. बरडे, सहायक कृषी अधिकारी यांनी पारंपरिक शेतीला आधुनिक तंत्रज्ञानाची जोड देणे व शेतीपूरक व्यवसाय सुरू करण्याबाबत मार्गदर्शन केले. तसेच खरीप हंगामातील कापूस, तूर व सोयाबीन पिकांवरील कीड/रोग ओळख व एकात्मिक कीड व रोग व्यवस्थापन याबाबत सविस्तर माहिती दिली.
एस. एम. घुगे, सहायक कृषी अधिकारी यांनी तुती लागवड योजना, बांबू लागवड योजना व गोपीनाथ मुंडे शेतकरी अपघात विमा योजना यावर मार्गदर्शन केले.
सरपंच प्रियांका प्रमोद कोल्हे यांच्या हस्ते दररोज फवारणी करणाऱ्या शेतमजुरांना फवारणीसाठी सुरक्षा किटचे वितरण करण्यात आले. यावेळी एम. आर. पत्रे यांनी किटकनाशके खरेदी व वापरताना घ्यावयाची खबरदारी, विषबाधा झाल्यास प्रथमोपचार व फवारणीदरम्यान घ्यावयाच्या उपाययोजना यावर प्रात्यक्षिकासह सविस्तर मार्गदर्शन केले.
या शिबिरात सरपंच प्रियांका प्रमोद कोल्हे, उपसरपंच पदमाकर देरकर, पोलीस पाटील प्रदीप बलकी, राशन दुकानदार सुधाकर तुराणकर, महसूल अधिकारी, ग्रामपंचायत अधिकारी, कृषी अधिकारी, जि.प. प्राथमिक शाळेचे शिक्षकवृंद, आरोग्य विभागाचे अधिकारी व कर्मचारी, तसेच गावातील शेतकरी बांधव व शालेय विद्यार्थी मोठ्या संख्येने उपस्थित होते.
कार्यक्रमाचे सूत्रसंचालन नितीन कतरे, ग्राम महसूल अधिकारी, बोरगाव (मे) यांनी केले व त्यांनी उपस्थित सर्व विभागांचे अधिकारी, कर्मचारी व शेतकरी बांधवांचे मनःपूर्वक आभार मानले.
