News Today
वणी – वणीतील सुप्रसिद्ध हॉटेल उद्योजक आणि समाजप्रिय व्यक्तिमत्त्व दिलीप उर्फ मोन्टू वाधवानी (वय 56) यांचे दीर्घ आजाराने शनिवार, 9 ऑगस्ट रोजी रात्री 8 वाजता हैदराबाद येथे उपचारादरम्यान निधन झाले. गेल्या काही महिन्यांपासून ते फुफ्फुसाच्या आजाराने त्रस्त होते. मागील चार महिन्यांपासून त्यांच्यावर हैदराबाद येथील रुग्णालयात उपचार सुरू होते, मात्र प्रकृती खालावत गेल्याने अखेर त्यांनी अखेरचा श्वास घेतला.
मोन्टू वाधवानी हे सिंधी कॉलनीतील “मोन्टू का धाबा” या लोकप्रिय रेस्टॉरन्टचे संचालक होते. त्यांच्या रुचकर जेवणासाठी तसेच आपुलकीच्या वागणुकीसाठी ते परिसरात विशेष प्रसिद्ध होते. व्यावसायिक क्षेत्रासोबतच ते सामाजिक व राजकीय क्षेत्रातही सक्रीय होते. एक कट्टर शिवसैनिक म्हणून त्यांनी शिवसेनेच्या विविध उपक्रमांमध्ये उत्साहाने सहभाग घेतला.
आपुलकीचा स्वभाव, मोकळेपणाने संवाद साधण्याची हातोटी आणि गरजूंना मदतीचा हात देण्याची वृत्ती यामुळे वणीच्या नागरिकांच्या मनात त्यांनी विशेष स्थान निर्माण केले होते. त्यांच्या निधनाने वणी शहरात हळहळ व्यक्त होत आहे.
त्यांच्या पार्थिवावर आज (10 ऑगस्ट) दुपारी वणी येथील मोक्षधाम येथे अंत्यसंस्कार करण्यात येणार आहेत. अंत्ययात्रा दुपारी 2 वाजता शेतकरी मंदिरासमोर असलेल्या राहत्या घरातून निघणार आहे. त्यांच्या निधनाने वणी शहराने एक उदार मनाचा, समाजप्रिय आणि हसतमुख व्यक्ती गमावली असल्याची भावना नागरिकांमध्ये आहे.
वणी तुडेच्या सर्व वाचकांकडून तसेच स्थानिक नागरिकांनी त्यांना भावपूर्ण श्रद्धांजली अर्पण केली आहे.
