News Today
वणी (प्रतिनिधी) – वणी शहरातील मुख्य भाजी मंडीलगत असलेल्या नगर परिषदेच्या सार्वजनिक शौचालय परिसरात गेल्या अनेक दिवसांपासून अवैधरित्या ‘वरली मटका’चा व्यवसाय फोफावला असून, स्थानिक प्रशासन व पोलिस यंत्रणेकडून होणाऱ्या दुर्लक्षामुळे नागरिकांमध्ये संतापाची लाट उसळली आहे.
वणीचे पोलिस निरीक्षक गोपाल उंबरकर यांनी वणी पोलीस स्टेशनच्या कर्मचाऱ्यांना स्पष्ट आदेश दिले असतानाही, या अवैध व्यवसायावर अद्याप ठोस कारवाई झालेली नाही. त्यामुळे या मटक्याच्या अड्ड्याला कोणाचे आशीर्वाद मिळत आहेत? असा प्रश्न नागरिक विचारत आहेत.
या मटका व्यवसायात दररोज हजारो रुपयांची उलाढाल होत असून, युवकांचा यात मोठ्या प्रमाणात ओढा वाढत आहे. परिणामी, तरुणांचे आयुष्य अधोगतीला लागण्याची भीती व्यक्त होत आहे. शिवाय, शौचालय परिसरात सुरू असलेल्या या गैरवर्तनामुळे महिलांवर होणारे मानसिक त्रास, मजुरांच्या जीवनात निर्माण होणारी आर्थिक अस्थिरता व समाजातील नैतिक अधःपतन हे गंभीर प्रश्न बनले आहेत.
कायद्यानुसार सार्वजनिक ठिकाणी अशा प्रकारच्या जुगाराच्या अड्ड्यांना जागा नाही. तसेच भारतीय दंड संहितेतील संबंधित कलमांनुसार, असे व्यवसाय बेकायदेशीर असून पोलिसांनी त्वरित कारवाई करणे अपेक्षित आहे. मात्र, प्रशासनाच्या या दुर्लक्षामुळे स्थानिक गुन्हेगारीला चालना मिळत आहे.
नागरिकांचा आवाज: “आमच्या घरासमोरच हा मटका सुरू आहे. लहान मुलांपासून महिलांपर्यंत सर्वांनाच त्रास होतोय. पोलीस येतात, पण काहीच घडत नाही,” असे एका स्थानिक नागरिकाने नाव न छापण्याच्या अटीवर सांगितले.
स्थानिक सामाजिक संस्थांनी याविरोधात जनजागृती मोहीम सुरू करण्याची गरज निर्माण झाली. तसेच, काही नागरिकांनी या प्रकरणाची दखल घेऊन जिल्हा पोलीस अधीक्षकांकडे तक्रार दाखल करण्याचा इशारा दिला आहे.
थोडक्यात: वणी शहरातील भाजी मंडीलगतचा परिसर सध्या ‘वरली मटका’च्या अड्ड्याचे रूप घेत असून, पोलीस प्रशासनाच्या निष्क्रियतेमुळे समाजात अस्वस्थता पसरली आहे. आता या गैरव्यवहाराविरोधात ठोस कारवाई केली जाणार का, हे येत्या काळात स्पष्ट होईल.
नगर परिषदेने लक्ष देण्याची गरज :- स्थानिक नगर परिषदेच्या तोंडासमोरील सार्वजनिक शौचालयाच्या बाजूला शासकीय जागेवर हा बेकायदेशीर व्यवसाय चालू असून या व्यवसायाला शौचालयाचे कंत्राट घेणारे कंत्राटदेखील हातभार लावत असल्याने हा कंत्राट रद्द करण्याची मागणी नागरिकांनी केली आहे.
