News Today
वणी:- मुकुटबन येथील सिमेंट काँक्रीट रस्ता बांधकामामध्ये गंभीर अनियमितता होत असल्याचा आरोप करीत या प्रकरणाची स्वतंत्र उच्चस्तरीय चौकशी करून संबंधित अधिकाऱ्यांवर तातडीने कारवाई करण्याची मागणी करण्यात आली आहे.
या संदर्भात सार्वजनिक बांधकाम विभागाचे मुख्य सचिव, मंत्रालय, मुंबई यांच्याकडे सविस्तर लेखी तक्रार सादर करण्यात आली असून, यापूर्वीही मुख्य अभियंता, अमरावती, अधीक्षक अभियंता, यवतमाळ, कार्यकारी अभियंता, पांढरकवडा, उपविभागीय अभियंता, मारेगाव आणि शाखा अभियंता, मारेगाव यांच्याकडे वारंवार तक्रारी देण्यात आल्या आहेत. मात्र, अद्याप कोणतीही ठोस किंवा प्रभावी कारवाई झालेली नसल्याचा आरोप करण्यात आला आहे.
तक्रारीनुसार, रस्ता बांधकामामध्ये निविदेतील अटींचे पालन होत नसून आर.एम.सी. प्लांट, ट्रान्झिट मिक्सर, व्हायब्रेटर, आवश्यक यंत्रसामग्री आणि गुणवत्ता नियंत्रणाबाबत गंभीर प्रश्न उपस्थित झाले आहेत. त्यामुळे संपूर्ण कामाचे स्वतंत्र थर्ड पार्टी टेक्निकल ऑडिट करून दोषींवर कठोर कारवाई करण्यात यावी, अशी मागणी करण्यात आली आहे.
देशाचे पंतप्रधान नरेंद्र मोदी, केंद्रीय गृहमंत्री अमित शहा, केंद्रीय रस्ते वाहतूक व महामार्ग मंत्री नितीन गडकरी आणि महाराष्ट्राचे मुख्यमंत्री देवेंद्र फडणवीस यांना उद्देशूनही प्रश्न उपस्थित करण्यात आला आहे की, “देश स्पेस टेक्नॉलॉजीमध्ये प्रगती करत असताना महाराष्ट्रात अशा पद्धतीने रस्ते बांधकाम होणार असेल तर याकडे लक्ष दिले जाणार का? या प्रकरणातील भ्रष्टाचारावर कारवाई होणार की भ्रष्टाचाराला पाठबळ दिले जाणार?”
तसेच, कार्यकारी अभियंता, पांढरकवडा, उपविभागीय अभियंता, मारेगाव आणि शाखा अभियंता, मारेगाव यांच्यावर चौकशी पूर्ण होईपर्यंत निलंबनाची कारवाई होणार का? असा थेट सवालही करण्यात आला आहे.
याशिवाय, काही दिवसांपूर्वी एका कंत्राटदाराने “रस्ता बांधकामाच्या रकमेपैकी ५६ टक्के रक्कम लोकप्रतिनिधी आणि अधिकाऱ्यांना द्यावी लागते” असा सार्वजनिक आरोप केला होता. या आरोपांची सत्यता सक्षम यंत्रणेमार्फत निष्पक्ष चौकशीतून स्पष्ट व्हावी, अशी मागणी करण्यात आली आहे.
या आरोपांची स्वतंत्रपणे अधिकृत पुष्टी झालेली नसून त्यांची निष्पक्ष चौकशी होणे आवश्यक असल्याचेही निवेदनात नमूद करण्यात आले आहे.
तक्रारींकडे सातत्याने दुर्लक्ष होत असल्याने आता मंत्रालय स्तरावर हस्तक्षेप करून संपूर्ण प्रकरणाची स्वतंत्र चौकशी करण्यात यावी आणि दोषींवर कठोर कारवाई करण्यात यावी, अशी मागणी करण्यात आली आहे.
बघा युट्यूब चॅनलवर व्हिडिओ बातमी 👇
