News Today
वणी विधानसभा मतदारसंघाचे माजी आमदार तथा शिवसेनेचे ज्येष्ठ नेते विश्वास नांदेकर यांचे मुंबई येथे दिनांक २१ डिसेंबर रोजी रात्री ११ वाजता दुःखद निधन झाले. मुंबईतील लीलावती रुग्णालयात ते गेल्या महिन्याभरापासून उपचार घेत होते. उपचारादरम्यान अखेर त्यांनी शेवटचा श्वास घेतला. त्यांच्या निधनाने वणी विधानसभा मतदारसंघासह संपूर्ण शिवसेना परिवारावर शोककळा पसरली आहे. दिनांक २३ डिसेंबर रोजी त्यांचेवर वणी तालुक्यातील त्यांचेमुळ गाव पठारपूर येथे सकाळी १० वाजता अंत्यविधी आटोपणार आहे.
विश्वास नांदेकर हे २००४ ते २००९ या कालावधीत वणी विधानसभेचे आमदार होते. त्यांच्या कार्यकाळात त्यांनी मतदारसंघाच्या सर्वांगीण विकासासाठी भरीव योगदान दिले. रस्ते, पाणीपुरवठा, शिक्षण, आरोग्य तसेच मूलभूत सुविधांसाठी त्यांनी सातत्याने पाठपुरावा केला. सामान्य जनतेच्या प्रश्नांसाठी ते नेहमी आक्रमक भूमिका घेत असत.
अन्याय, भ्रष्टाचार आणि शोषणाविरोधात ते तुटून पडणारे नेतृत्व म्हणून ओळखले जात होते. जनतेसाठी रस्त्यावर उतरून संघर्ष करण्याची त्यांची तयारीच त्यांची ओळख होती. याच निर्भीड आणि आक्रमक स्वभावामुळे त्यांना “शिवसेनेचा वाघ” म्हणून ओळखले जात होते.
ते शिवसेनाप्रमुख बाळासाहेब ठाकरे यांचे खंदे समर्थक आणि निष्ठावंत शिवसैनिक होते. बाळासाहेबांच्या विचारांवर त्यांची नितांत श्रद्धा होती आणि त्या विचारांची अंमलबजावणी करण्यासाठी त्यांनी आयुष्यभर काम केले. शिवसेनेच्या संघटनात्मक बांधणीतही त्यांचा मोठा वाटा होता.
त्यांच्या निधनाचे वृत्त समजताच राजकीय, सामाजिक क्षेत्रातून तसेच सर्वसामान्य नागरिकांकडून शोकसंवेदना व्यक्त केल्या जात आहेत. वणी मतदारसंघातील नागरिकांनी एका कर्तृत्ववान, लढवय्या आणि जनतेच्या हक्कासाठी झटणाऱ्या नेतृत्वाला आज कायमचे गमावले आहे.
विश्वास नांदेकर यांच्या पश्चात कुटुंबीय, असंख्य कार्यकर्ते आणि चाहत्यांचा मोठा परिवार आहे. त्यांच्या जाण्याने निर्माण झालेली पोकळी कधीही भरून न निघणारी आहे.
भावपूर्ण श्रद्धांजली. 🙏
