News Today
वणी (प्रतिनिधी): वणी नगरपरिषद निवडणुकीच्या पार्श्वभूमीवर शिवसेना (शिंदे गट)च्या रॅलीने शहरातील राजकीय वातावरण ढवळून काढले आहे. १७ नोव्हेंबर रोजी अध्यक्षपदासह २९ उमेदवारांचे अर्ज भरताना शिंदे गटाने घेतलेले शक्तीप्रदर्शन ऐतिहासिक ठरले. ढोल-ताशांचा गजर, भगव्या झेंड्यांची लाट आणि कार्यकर्त्यांचा उत्साह यामुळे संपूर्ण शहर केशरी रंगात न्हाऊन निघाले.
या रॅलीचे नेतृत्व ज्येष्ठ नेते आणि समाजसेवक विजयबाबू चोरडिया यांनी केले. त्यांच्या नेतृत्वाखालील या दमदार आयोजनाने भाजपच्या खेम्यात चांगलीच खळबळ निर्माण केली आहे.
उपमुख्यमंत्री एकनाथ शिंदे आणि पालकमंत्री संजय राठोड यांच्या उपस्थितीत भाजपा सोडून शिंदे गटात दाखल झाल्यानंतर अवघ्या सव्वा महिन्यातच चोरडिया यांनी शहरात ठोस संघटन उभे केले आहे.
शहरातील अनेक ज्येष्ठ कार्यकर्ते आणि नागरिक शिंदे गटात सहभागी होत असल्याने वणी–झरी–मारेगाव परिसरात पक्षाची ताकद वाढताना दिसत आहे. माजी आमदार विश्वास नांदेकर यांच्या मार्गदर्शनाखाली पक्षाने स्थानिक स्तरावर जोरदार पकड निर्माण केली आहे.
रंगनाथ स्वामी देवस्थान येथून निघालेल्या रॅलीत नागरिकांनी फुलांचा वर्षाव करत चोरडिया यांचे स्वागत केले. एकत्रित उत्साह, घोषणाबाजी आणि शिस्तबद्ध शक्तीप्रदर्शनाने वणीच्या राजकारणात नव्या समीकरणांची चाहूल लागली आहे.
राजकीय विश्लेषकांचे मत आहे की, या रॅलीनंतर नगरपरिषद निवडणुकीची बाजी शिंदे गटाच्या दिशेने झुकताना दिसत आहे, तर भाजपसमोर कठीण आव्हान उभे राहिले आहे.
