News Today
वणी, १८ जून २०२५ – शहरातील बालशिक्षणाच्या क्षेत्रात एक नवीन पर्व सुरू करत ‘आरंभ इंटरनॅशनल प्रीस्कूल’चा भव्य व दिमाखदार उद्घाटन सोहळा १८ जून रोजी मोठ्या उत्साहात पार पडला. अत्याधुनिक सोयी-सुविधांनी सज्ज असलेल्या या प्रीस्कूलचे उद्घाटन माननीय उपविभागीय पोलीस अधिकारी श्री. गणेश किंद्रे यांच्या हस्ते संपन्न झाले.
कार्यक्रमाचे प्रमुख अतिथी वणी नगर परिषदेचे मुख्याधिकारी डॉ. सचिन गाडे होते. त्यांनी आपल्या प्रेरणादायी भाषणातून बालशिक्षणातील शिस्त, संस्कार आणि शैक्षणिक संस्थांचे समाजातील योगदान यावर प्रकाश टाकला.
या कार्यक्रमाच्या अध्यक्षस्थानी संस्थेचे अध्यक्ष श्री. अंबादास वागदरकर होते. त्यांच्यासह मा. अशोक गौरकार व मा. अरुण डवरे यांनीही कार्यक्रमाला विशेष उपस्थिती लावली. ‘आरंभ’च्या संकल्पनेचे कौतुक करत त्यांनी संस्थेच्या पुढील वाटचालीस शुभेच्छा दिल्या. बालवयात दिले जाणारे मूल्य व संस्कार हेच आयुष्याचा पाया ठरतात, आणि ‘आरंभ’ ही शाळा हे कार्य प्रभावीपणे पार पाडेल, असा विश्वास त्यांनी व्यक्त केला.
कार्यक्रमाला छत्रपती शिवाजी महाराज मॉर्निंग ग्रुपचे अध्यक्ष श्री. सुभाष बिलोरीया, श्री. अनुज मुकेवार, प्रख्यात विधिज्ञ अॅड. अमोल कळसकर, तसेच महिला योगा ग्रुपच्या योगगुरू सौ. भारती आवारी व सौ. सविता डोर्लीकर यांच्यासह अनेक मान्यवरांची उपस्थिती लाभली. त्यांनी शाळेच्या व्यवस्थापनाचे कौतुक करत, अशा सुरक्षित व मूल्याधारित शिक्षणसंस्थांची आजच्या काळात गरज असल्याचे सांगितले.
शाळेच्या परिसराचे आकर्षक व बालसुलभ प्रात्यक्षिकही पालकांसाठी खुले करण्यात आले होते. सुरक्षित वातावरण, अत्याधुनिक तंत्रज्ञान, प्रेमळ व प्रशिक्षित शिक्षकवर्ग, तसेच मुलांच्या सर्वांगीण विकासासाठी विविध दर्जेदार उपक्रम ही ‘आरंभ’ची वैशिष्ट्ये ठरली.
कार्यक्रमाचे प्रास्ताविक संस्थेचे सचिव श्री. मंगेश खामनकर यांनी केले. प्रभावी सूत्रसंचालन शिक्षिका सौ. सोनाली मोरे यांनी तर आभार प्रदर्शन सौ. पायल पुलेनवार यांनी केले. उपस्थित पालक व नागरिकांनी या उपक्रमाचे कौतुक करत, ‘आरंभ’ ही शाळा लवकरच शहरातील शिक्षण क्षेत्रात एक आदर्श ठरेल, असा विश्वास व्यक्त केला.
“छोट्या पावलांनी मोठा आरंभ!” या विचाराने प्रेरित होऊन सुरु झालेला ‘आरंभ इंटरनॅशनल प्रीस्कूल’चा प्रवास निश्चितच यशस्वी व तेजस्वी ठरेल, अशी भावना कार्यक्रमाच्या समारोपाला सर्व मान्यवरांनी व्यक्त केली. कार्यक्रमाच्या यशस्वितेसाठी सौ. वैशाली घोंगे व सर्व संचालक मंडळाने विशेष परिश्रम घेतले.
