दिनांक: २३ जून २०२५ | News Today
वणी :- विधानसभा क्षेत्रातील जनतेशी थेट संवाद साधण्याच्या आपल्या खास शैलीमुळे ओळखले जाणारे वणीचे आमदार संजय निलकंठराव देरकर यांनी आज (२३ जून) रोजी सकाळी १० वाजताच्या सुमारास तुटी कमान चौक परिसरात मिळेल तेवढं काम करून उदरनिर्वाह करणाऱ्या मिस्त्री, हमाल, फेरीवाले, लहानसहान हातगाडीधारक व कामगार बांधवांशी संवाद साधला.
हातातल्या कामामधून वेळ काढत आमदारांनी कामगारांशी संवाद साधला. त्यांच्या अडचणी ऐकून घेतल्या व त्यावर त्वरित उपाय देण्याचा प्रयत्न केला. खास बाब म्हणजे, त्यांनी कामगार बांधवांना स्वतःचे युनिट किंवा छोटं व्यवसायिक गट स्थापन करण्याचा सल्ला दिला. शासनाच्या विविध योजना – जसे की मुख्यमंत्री रोजगार निर्मिती योजना, प्रधानमंत्री मुद्रा योजना, व कौशल्य विकास कार्यक्रम – यांचा लाभ घेण्यासाठी नोंदणीकृत युनिट असणं आवश्यक असल्याचे त्यांनी समजावले.
“फक्त मजुरीवर जगणं ही वेळची गरज असू शकते, पण स्वतःचा व्यवसाय सुरू केल्यास भविष्यात आर्थिक स्थैर्य आणि आत्मसन्मान मिळेल. त्यासाठी मी स्वतः मार्गदर्शन करायला तयार आहे,” असा ठाम विश्वास आमदारांनी व्यक्त केला.
या संवादामुळे अनेक कामगारांना आपला व्यवसाय सुरू करण्याची प्रेरणा मिळाली. काहींनी लगेचच नोंदणी प्रक्रियेबाबत विचारणा केली.
स्थानिक नागरिकांनी आमदारांच्या या भूमिकेचं स्वागत केलं असून, “फक्त घोषणा नव्हे, तर जमिनीवर उतरून संवाद साधणारा आमदार मिळणं ही मोठी बाब आहे,” असं मत काही नागरिकांनी व्यक्त केलं.
प्रमुख मुद्दे:
कामगारांना युनिट स्थापन करण्याचा सल्ला
शासन योजनांची माहिती आणि त्या मिळवण्याचे मार्गदर्शन
स्थानिक स्वावलंबनाच्या दिशेने महत्त्वाचे पाऊल
प्रत्यक्ष मैदानात उतरून कामगारांशी थेट संवाद
कामगारांसोबत थेट संवाद साधल्याने कामगारांना एक नवीन ऊर्जा मिळाली असून कामगारांमध्ये आनंदाचे वातावरण निर्माण झाले.
