News Today
वणी – नगर परिषदेच्या निवडणुकीत मतदारांना पैसे वाटप केल्याचा व्हिडिओ समाजमाध्यमांवर व्हायरल होत असताना निवडणूक विभाग तसेच पोलिस प्रशासन याकडून कोणतीही ठोस कारवाई न झाल्याचा गंभीर आरोप बिगर सातबारा शेतकरी संघटनेचे प्रणेते भाई जगदिश कुमार इंगळे यांनी विशेष प्रसिध्दीपत्रकाद्वारे केला आहे.
इंगळे यांनी म्हटले आहे की, निवडणुकीत मतासाठी पैसे घेणारे आणि पैसे देणारे अशा दोघांविरुद्धही तत्काळ आणि कठोर कारवाई होणे आवश्यक आहे. भारतीय जनता पक्षाच्या वतीने मतदारांना पैसे वाटप केल्याचा व्हिडिओ समोर आला असतानाही निवडणूक विभाग “मूग गिळून बसला आहे” तर पोलिस यंत्रणा “डोळे झाकून चालली आहे”, असा इंगळे यांनी आरोप केला.
सदर प्रकरणाचा गांभीर्याने विचार न केल्यास लवकरच निवडणूक विभागाविरोधात तीव्र आंदोलन छेडण्यात येईल, असा इशारा त्यांनी प्रसिध्दीपत्रकातून दिला असून पोलिस स्टेशन, वणी येथे रीतसर तक्रार दाखल केली जाणार असल्याचेही त्यांनी स्पष्ट केले.
पैसे वाटप करून सशक्त लोकशाहीला खिळ बसवत लोकशाहीच्या पाठीत खंजीर खुपसण्याचे काम भारतीय जनता पक्षाने केले असल्याचा आरोपही इंगळे यांनी केला. या प्रकरणी निवडणूक विभाग व पोलिस यंत्रणा कोणती कारवाई करणार, याकडे संपूर्ण वणी तालुक्याचे लक्ष लागले आहे.
