News Today
विवेक ठाकरे प्रतिनिधी
वणी:- राज्य शासनाच्या कृषी विभागाने बियाणे विक्रीसाठी ‘साथी पोर्टल 2’ चा वापर अनिवार्य केला आहे. मात्र या पोर्टलचा वापर प्रत्यक्षात करणे विक्रेत्यांसाठी अव्यवहार्य ठरत असल्याने वणी, झरी-जामणी आणि मारेगाव तालुक्यातील कृषी विक्रेता संघटनेने मंगळवारी कडकडीत बंद पाळला.
शासनाने बियाणे कंपन्यांसाठी फेज 1 मोहीम आणि विक्रेत्यांसाठी फेज 2 मोहीम जाहीर केली आहे. फेज 1 संदर्भात विक्रेत्यांना काहीही हरकत नसली, तरी फेज 2 अंतर्गत पोर्टल 2 द्वारे बियाणे खरेदी-विक्री सक्तीने करावी लागणार असल्यामुळे विक्रेत्यांनी तीव्र नाराजी व्यक्त केली आहे. या आदेशाचे पालन न करणाऱ्या विक्रेत्यांना नोटीस देणे, परवाना निलंबित करणे अशा प्रकारच्या कारवाया करण्यात येत असल्याने विक्रेत्यांवर दबाव आणला जात असल्याचा आरोप संघटनेने केला आहे.
याशिवाय काही बियाणे व खत उत्पादक कंपन्यांकडून “लिकिंग” पद्धतीने कृषी विक्रेत्यांना खत पुरवठा करण्याची सक्ती केली जात असल्याची तक्रार करण्यात आली. या पद्धतीमुळे शेतकऱ्यांना आवश्यक नसलेली खते खरेदी करावी लागत असून त्यांचा आर्थिक भुर्दंड वाढत असल्याचे विक्रेत्यांनी नमूद केले. त्यामुळे या कंपन्यांच्या विरोधातही या बंददरम्यान घोषणाबाजी करण्यात आली.
बंदच्या पार्श्वभूमीवर झालेल्या बैठकीत खालील ठराव सर्वानुमते मंजूर करण्यात आले —
1️⃣ कोणतेही लिकिंग साहित्य खरेदी करू नये.
2️⃣ भाडेतत्त्वावर (Freight basis) येणाऱ्या सर्व ऑर्डर तात्काळ रद्द कराव्यात.
3️⃣ पुढील काळात कोणतेही खत किंवा कृषी साहित्य लिकिंग किंवा अनपेड फ्रेड पद्धतीने खरेदी करू नये.
4️⃣ साथी पोर्टल 2 च्या विरोधात आवश्यकतेनुसार आंदोलन करणे सर्व विक्रेत्यांना बंधनकारक राहील.
या ठरावांची अंमलबजावणी सर्व कृषी सेवा केंद्र चालकांनी करण्याचे ठरविण्यात आले.
या संपात जिल्हा उपाध्यक्ष प्रशांत पाचभाई, वणी तालुकाध्यक्ष देवराव काकडे, झरी-जामणी तालुकाध्यक्ष विजय कोठारी, मारेगाव तालुकाध्यक्ष प्रदीप उत्तरवार यांच्यासह वणी, झरी आणि मारेगाव तालुक्यातील सुमारे 120 कृषी सेवा केंद्र चालकांनी उत्स्फूर्त सहभाग नोंदवून बंद यशस्वी केला.
