News Today
भद्रावती (चंद्रपूर) : भद्रावती तालुक्यात कार्यरत असलेले नायब तहसीलदार सुधीर खांडरे यांना शासनाने निलंबित केले आहे. महसूल व वन विभागाने दि. ३ ऑक्टोबर २०२५ रोजी काढलेल्या आदेशानुसार न्यायालयाच्या आदेशाची अंमलबजावणी करण्यात झालेल्या कसुरीस जबाबदार धरून ही कारवाई करण्यात आली आहे.
मौजे कुरोडा ता. भद्रावती जि. चंद्रपूर येथील सर्व्हे क्रमांक ८६, ८७, ९५ व ९८ या मालमत्तेबाबत दाखल करण्यात आलेल्या प्रकरणात दि. १२ ऑगस्ट २०१५ रोजी दिवाणी न्यायालयाने दिलेल्या निकालानुसार संबंधित अभिलेखांमध्ये अर्जदार परमेश्वर विश्वनाथ मेश्राम यांच्यासह इतर कायदेशीर वारसांची नावे नोंदविण्याची कार्यवाही अपेक्षित होती. तथापि, संबंधित आदेशाची अंमलबजावणी करण्याऐवजी “मालकी हक्काबाबत वाद” असल्याचे कारण दाखवत अर्ज निकाली काढण्यात आला.
ही बाब शासनाच्या निदर्शनास आल्यावर महसूल व वन विभागाने चौकशी केली असता, खांडरे यांनी महाराष्ट्र जमीन महसूल अधिनियम, १९६६ तसेच महाराष्ट्र नागरी सेवा (वर्तणूक) नियम, १९७९ मधील नियम ३ यांचे उल्लंघन केल्याचे स्पष्ट झाले. जबाबदार पदावर कार्यरत असताना त्यांनी जाणीवपूर्वक कर्तव्यात कसुरी केल्याचा ठपका ठेवण्यात आला आहे.
त्याअर्थी, महाराष्ट्र नागरी सेवा (शिस्त व अपिल) नियम १९७९ मधील नियम ४ (१) (अ) अंतर्गत शासनाने त्यांना तात्काळ प्रभावाने सेवेतून निलंबित करण्याचा निर्णय घेतला. निलंबनाच्या कालावधीत त्यांचे मुख्यालय जिल्हाधिकारी कार्यालय, चंद्रपूर असेल. जिल्हाधिकारी यांच्या परवानगीशिवाय त्यांनी मुख्यालय सोडता कामा नये, असे आदेश देण्यात आले आहेत.
निलंबनाच्या कालावधीत त्यांना नियमांनुसार निलंबन निर्वाह भत्ता मिळणार आहे. मात्र, या काळात त्यांनी कोणतीही खाजगी नोकरी, धंदा वा व्यापार करू नये. प्रत्येकवेळी निर्वाह भत्ता स्वीकारताना त्यांनी अशा प्रकारचे प्रमाणपत्र देणे बंधनकारक असेल.
ही कारवाई महाराष्ट्राचे राज्यपाल यांच्या आदेशाने करण्यात आली असून, शासन आदेशावर अवर सचिव प्रविण पाटील यांच्या सही आहे.
👉 भद्रावती तालुक्यातील महसूल प्रशासनात खळबळ उडवणाऱ्या या कारवाईबद्दल परिसरात मोठी चर्चा सुरू झाली आहे.
