स्थानिक बेरोजगारांना रोजगार नाकारल्याचा आरोप; आंदोलन ‘भाकप स्टाईल’ने उग्र करण्याचा इशारा
News Today
वणी (जि. यवतमाळ), १० मे:
बेलोरा (निलजई) परिसरातील जी.आर.एन. कंपनीत स्थानिक बेरोजगारांना प्राधान्य देण्याचे लेखी आश्वासन देऊनही कंपनीने फक्त ड्रायव्हर पदांपुरतेच भरती करत इतर पदांवरील नियुक्तीपासून स्थानिकांना वंचित ठेवले आहे. त्यामुळे भारतीय कम्युनिस्ट पक्षाने (भाकप) पुन्हा एकदा कामबंद आंदोलन सुरू केले असून, हे आंदोलन अधिक तीव्र करण्याचा इशारा देण्यात आला आहे.
२५ ते २७ एप्रिल २०२५ दरम्यान भाकपच्या नेतृत्वाखाली कंपनीसमोर बेमुदत धरणे आंदोलन करण्यात आले होते. त्यावेळी कंपनीच्या वरिष्ठ अधिकाऱ्यांशी झालेल्या चर्चेनंतर ३५ स्थानिक बेरोजगारांना नोकरी देण्याचे आश्वासन देण्यात आले होते. यावरून आंदोलन मागे घेण्यात आले होते. मात्र, आता कंपनी केवळ ड्रायव्हर पदांसाठीच स्थानिकांची निवड करत असून, लेबर किंवा इतर पदांसाठी बाहेरील मजुरांना प्राधान्य दिले जात असल्याचा आरोप भाकपने केला आहे.
भाकप वणी विधानसभा क्षेत्राचे नेते काॅ. अनिल हेपट, जिल्हा सचिव काॅ. अनिल घाटे, शिंदोला जि.प. सर्कलचे नेते काॅ. मोरेश्वर कुंटलवार, व काॅ. मिलींद रामटेके यांच्या नेतृत्वाखाली आंदोलन पुन्हा सुरू करण्यात आले आहे. आंदोलनात शेकडो युवक सहभागी झाले आहेत.
काॅ. अनिल हेपट यांनी स्पष्ट इशारा दिला की, “कंपनीने तात्काळ आपले आश्वासन पूर्ण करावे अन्यथा भाकप स्टाईलने आंदोलन तीव्र करण्यात येईल, ज्याची संपूर्ण जबाबदारी कंपनीवर राहील.”
स्थानिक युवकांचा रोजगाराचा मुद्दा पुन्हा एकदा पेट घेत असून, प्रशासन आणि कंपनीने याकडे गांभीर्याने लक्ष देणे गरजेचे ठरत आहे.
