News Today
वणी, ८ मे – देशात सध्या उद्भवलेल्या युद्धजन्य परिस्थितीच्या पार्श्वभूमीवर शिवसेना (उद्धव बाळासाहेब ठाकरे) पक्षाने ९ मे रोजी जिल्हाधिकारी कार्यालयांवर नियोजित केलेला ट्रॅक्टर मोर्चा तात्पुरता स्थगित करण्याचा निर्णय घेतला आहे.
हा निर्णय पक्षाच्या वरिष्ठ नेत्यांच्या सूचनेनुसार आणि राष्ट्रीय सुरक्षेच्या दृष्टीने गांभीर्याने विचार करून घेण्यात आला आहे. याबाबतची माहिती वणी येथील आमदार संजय देरकर यांच्या जनसंपर्क कार्यालयाकडून देण्यात आली.
शेतकऱ्यांच्या विविध मागण्यांसाठी आणि त्यांच्या प्रश्नांकडे शासनाचे लक्ष वेधण्यासाठी हा ट्रॅक्टर मोर्चा आयोजित करण्यात आला होता. मात्र देशहिताचा विचार करत शिवसेना पक्षाने संयमाचे धोरण स्वीकारले असून लवकरच नव्याने आंदोलनाची तारीख जाहीर करण्यात येईल, असे आमदार संजय देरकर यांनी स्पष्ट केले आहे.
पक्षाच्या या निर्णयाचे अनेकांनी स्वागत केले असून सध्याच्या संवेदनशील परिस्थितीत हा निर्णय अत्यंत योग्य असल्याचे मत व्यक्त केले जात आहे.
