News Today
वणी (प्रतिनिधी): वणी तालुक्यातील पुरड ते कुंड्रा मार्गाचे डांबरीकरणाचे काम अत्यंत निकृष्ट पद्धतीने करण्यात आले असून, अवघ्या एका वर्षात हा रस्ता उखडण्याची चिन्हे दिसू लागली आहेत. सार्वजनिक बांधकाम विभाग व संबंधित कंत्राटदार यांनी गंभीर दुर्लक्ष केल्याचा आरोप स्थानिक जनतेतून होत आहे.
सदरील रस्त्याचे डांबरीकरण सेन्सर पेव्हरच्या साहाय्याने करणे आवश्यक होते, मात्र सेन्सर बंद ठेवून पारंपरिक पद्धतीने हे काम करण्यात आले. त्याचबरोबर, रस्त्यावरील बी.सी. (Bituminous Concrete) कोट हा नियमाप्रमाणे ५० एम.एम. असायला हवा होता, परंतु प्रत्यक्षात तो २५ एम.एम. पेक्षाही कमी जाडीचा टाकण्यात आल्याचे उघड झाले आहे.
बी.टी. कोटही सेन्सरशिवाय साधारण पद्धतीने टाकण्यात आल्यामुळे संपूर्ण मार्गाचा दर्जा अत्यंत हलका असून यामुळे वाहतुकीला धोका निर्माण झाला आहे. या प्रकाराला ‘जनतेच्या पैशाची उधळपट्टी’ संबोधत, राष्ट्रवादी काँग्रेस पार्टी (शरद पवार गट) चे विधानसभा अध्यक्ष दिलीप भोयर यांनी संबंधित कंत्राटदार व अधिकाऱ्यांवर तात्काळ आणि सक्त कारवाईची मागणी केली आहे.
संपूर्ण प्रकरणात उपविभागीय अभियंता परताणी आणि शाखा अभियंता राठी हे दोघेही डोळ्यावर पट्टी बांधून आंधळेपणाने वागत असल्याचे आरोप भोयर यांनी केले. यामुळे प्रशासनाची भूमिका संशयास्पद ठरत आहे.
स्थानिक नागरिक आणि जनप्रतिनिधींनी या कामाची सखोल चौकशी करून दोषींवर कारवाई करण्यात यावी, अशी जोरदार मागणी केली आहे.
